पर्सा, पोखरिया — मिति २०८२ जेठ २८ गते राति नेपाल विद्युत प्राधिकरण (ने.वि.प्रा.) पोखरिया वितरण केन्द्रको टोलीले विद्युत चोरी नियन्त्रणको लागि गरेको विशेष अपरेसनमा ८ जना व्यक्तिहरूलाई पक्राउ गरेको छ। उनीहरू पोखरिया वितरण केन्द्र अन्तर्गतका विभिन्न स्थानहरूमा डाइरेक्ट हुकिङ मार्फत अनाधिकृत रूपमा विद्युत प्रयोग गरिरहेका अवस्थामा पक्राउ परेका हुन्।
विद्युत चुहावट नियन्त्रण टोलीले नेपाल प्रहरी र सशस्त्र प्रहरी बलको संयुक्त सहयोगमा उक्त अपरेसन सञ्चालन गरेको थियो। अपरेसनका क्रममा प्रयोगमा ल्याइएको १ थान मोटर समेत बरामद गरिएको प्राधिकरणले जनाएको छ।
पक्राउ परेका व्यक्तिहरूलाई आवश्यक अनुसन्धान र कानुनी कारवाहीका लागि ईलाका प्रहरी कार्यालय, पोखरिया पर्सामा बुझाइएको छ।
नेपाल विद्युत प्राधिकरण, पोखरिया वितरण केन्द्रले आम सर्वसाधारणलाई विद्युत चोरी नगर्न र यस्ता अवैध कार्यको जानकारी निकटतम प्राधिकरण वा प्रहरीलाई दिन अनुरोध गरेको छ। प्राधिकरणले विद्युत चुहावट रोक्न नियमित रूपमा निगरानी र कारवाही प्रक्रिया अघि बढाइरहेको जनाएको छ।
