काठमाडौँ । नेकपा(माओवादी केन्द्र)ले नयाँ विधान तयार गरी निर्वाचन आयोगमा पठाएको छ । माओवादीको गत फागुन १ देखि ३ गतेसम्म प्रज्ञा भवन कमलादीमा सम्पन्न प्रथम विधान अधिवेशनले नेपाल कम्युनिस्ट पार्टी(माओवादी केन्द्र)को विधान–२०८० पारित गरेको थियो । यद्यपि विधान क्रमशः लागु हुँदै जाने माओवादीका महासचिव देव गुरुङले जानकारी दिए । उनले विधान क्रमशः लागु हुँदै गए पनि पूर्णरुपमा भने विशेष महाधिवेशनबाट मात्र कार्यान्वयनमा जाने रातोपाटीलाई बताए ।‘विधानलाई अन्तिम रूप दिएर निर्वाचन आयोगमा पठाइसकेको छ । पार्टीमा क्रमशः लागु हुँदै जान्छ । कमिटी फर्मेसनमा भने विशेष महाअधिवेशनपछि मात्र लागु हुनेछ’, उनले भने, ‘अर्को महाधिवेशन वा अधिवेशन नभएसम्म केन्द्रीय समिति, प्रदेश समिति र पालिका समिति यथावत् रहन्छ । पार्टी अनुशासनको कारबाही तथा अन्य गतिविधि नयाँ विधान अनुसार हुन्छ । यसका लागि हामीले संक्रमणालीन व्यवस्था विधानमै राखेका छौँ ।’माओवादीको विधानको धारा– ४४ मा सङ्क्रमणकालीन व्यवस्था राखिएको छ । ‘यो विधान बमोजिमका समितिहरू अधिवेशनहरू मार्फत क्रमशः गठन हुँदै जानेछन् । यस विधान अनुसारका समिति र निकायहरूले पूर्णता नपाउँदासम्म हाल कायम रहेका समिति र निकायहरू क्रियाशील रहनेछन्’, विधानमा उल्लेख छ ।नयाँ विधानलाई प्रस्तावनासहित ९ वटा भागमा विभाजन गरिएको छ । जसमा ४६ वटा धारा र ९ वटा अनुसूची छन् ।
