दिपक कुशवाहा पर्सागढी, ६ असोज
सङ्घ सरकारका खानेपानीमन्त्री प्रदीप यादवले जनता समाजवादी पार्टी ९जसपा०ले जनताको सेवा र मुलुकको विकासलाई केन्द्रमा राखेर काम गरिरहेको बताएका छन् ।
पर्सागढी नगरपालिका–८ हरपुरमा आयोजित कार्यक्रममा मन्त्री यादवले जसपा नेपालसँग अलग भएर जसपा गठन गर्नुको कारण उपेन्द्र यादवको गलत नेतृत्व र हैकमवादी शैली रहेको बताए । उपेन्द्र यादव नेतृत्वको जसपा नेपालले जनताको वास्तविक समस्या समाधान गर्न असफल हुँदै गएको तर उपेन्द्र यादवलाई सङ्गठनभित्र छलफल गर्दा चुपचाप लागेर बस्ने नेता–कार्यकर्ता चाहिएको मन्त्री यादवको भनाइ थियो । जसपा नेपाल अब केवल नारामैं सीमित रहेर जनतामा भ्रम उत्पन्न गरिरहेको उनको आरोप थियो । मधेसको अधिकार दिलाउने नाममा उपेन्द्र यादवले पटकपटक सत्तासँग सम्झौता गरेको आरोप लगाएका थिए ।
सङ्गठन विस्तार गर्न पार्र्टीका नेता तथा कार्यकर्तासँग मुलुकको समसामयिक राजनीतिक परिस्थिति, पार्र्टीको नीति र आगामी रणनीतिबारे पनि जानकारी गराएका थिए । पर्सा निर्वाचन क्षेत्र १ बाट निर्वाचित प्रतिनिधिसभा सदस्यसमेत रहेका मन्त्री यादवले स्थानीयस्तरमा देखिएका विकास निर्माणका चुनौतीहरू, विशेषगरी खानेपानी र सरसफाइका समस्याहरू समाधान गर्न पार्टीका जनप्रतिनिधिहरूसँग छलफल गरेका थिए ।
कार्यक्रममा नेता तबरेज अहमदले जसपा नेपालका अध्यक्ष उपेन्द्र यादवको नकारात्मक नेतृत्व शैलीले आफू र अन्य नेताहरूलाई पार्टी छोड्न बाध्य बनाएको बताएका थिए । “जसपा नेपालमा रहँदा जनताका समस्याहरूलाई प्राथमिकतामा राखेर काम भएको देखिनँ । पार्टीले जनअपेक्षा अनुसार प्रगति गर्न सकेन, त्यसैले मैले जसपा पार्टीमा प्रवेश गर्ने निर्णय गरें,” नेता अहमदले बताए ।
पर्सागढी वडा नं ६ का अध्यक्ष नवलकिशोर साह, वडाध्यक्ष रामबढाइ यादव, असलम आलम, वडाध्यक्ष तुफान अन्सारी, नेता असलम अन्सारी, विद्यार्थी नेता एजाजबाबू राकी, डा आमिर आलम, आमिर मन्सुरीलगायतको सहभागिता थियो ।
